నిలువునా చీలిన తాండూరు ప్రైవేట్ స్కూల్ అసోసియేషన్..!

వికారాబాద్ జిల్లా తాండూరు పట్టణంలో గత రెండు దశాబ్దాలుగా కొనసాగుతున్న ప్రైవేట్ స్కూల్ అసోసియేషన్‌లో విభేదాలు తలెత్తినట్లు తెలుస్తోంది. అధ్యక్ష పదవికి సంబంధించి కొంతకాలంగా కొనసాగుతున్న వివాదం నేపథ్యంలో ప్రైవేట్ పాఠశాలల యాజమాన్యాలు రెండు వర్గాలుగా విడిపోయినట్లు సమాచారం.తాండూరులోని ప్రైవేట్ పాఠశాలలకు సంబంధించిన సంఘంలో ఒకే పాఠశాలకు చెందిన వ్యక్తి రెండు సంవత్సరాలకు మించి అధ్యక్ష పదవిలో కొనసాగకూడదనే నిబంధన ఉందని ఒక వర్గం పేర్కొంటోంది. అయితే గతంలో ఒకే పాఠశాలకు చెందిన వ్యక్తులు వరుసగా మూడు దఫాలు, సుమారు ఆరు సంవత్సరాల పాటు అధ్యక్ష పదవిని నిర్వహించారనే ఆరోపణలు మరో వర్గం నుంచి వినిపిస్తున్నాయి.ఈ నేపథ్యంలో తాండూరులో తెలంగాణ రికగ్నైజ్డ్ స్కూల్ మేనేజ్‌మెంట్ అసోసియేషన్ (TRSMA) పేరుతో కొత్త సంఘాన్ని ఏర్పాటు చేసి, మోహనకృష్ణ గౌడ్‌ను నూతన అధ్యక్షుడిగా ఎన్నుకున్నట్లు సమాచారం.అయితే, తాండూరు పట్టణంలో గత 20 సంవత్సరాలుగా కొనసాగుతున్న ప్రైవేట్ స్కూల్ అసోసియేషన్‌కు TRSMAకు సంబంధం ఏమిటి? కొత్తగా ఏర్పడిన కమిటీకి 46 ప్రైవేట్ పాఠశాలల యాజమాన్యాల మద్దతు ఎంతవరకు ఉంది? అనే అంశాలపై ప్రస్తుతం చర్చ జరుగుతోంది.మాజీ అధ్యక్షులు ఈ పరిణామాల్లో కీలకంగా వ్యవహరించి TRSMAను తాండూరుకు తీసుకువచ్చినట్లు ఒక వర్గం పేర్కొంటోంది. రాష్ట్ర స్థాయిలో కొనసాగుతున్న TRSMAను స్థానిక ప్రైవేట్ స్కూల్ అసోసియేషన్‌కు ప్రత్యామ్నాయంగా తీసుకురావడంపై మరో వర్గం అభ్యంతరం వ్యక్తం చేస్తున్నట్లు తెలుస్తోంది.తమకు మెజార్టీ ప్రైవేట్ పాఠశాలల మద్దతు ఉందని మరో వర్గం నాయకులు చెబుతున్నట్లు సమాచారం. TRSMA ఏర్పాటు, నూతన అధ్యక్షుడి ఎంపికను తాము అంగీకరించేది లేదని వారు అంతర్గతంగా సమావేశాలు నిర్వహిస్తున్నట్లు తెలుస్తోంది.మరోవైపు, ఈ వ్యవహారంలో రాజకీయ జోక్యం కూడా ఉందనే చర్చ తాండూరు పట్టణంలో వినిపిస్తోంది. అధికార, విపక్ష పార్టీలకు చెందిన నాయకులు తమకు అనుకూలంగా ఉన్న వ్యక్తులకు మద్దతు ఇస్తున్నారనే ప్రచారం జరుగుతోంది. అయితే దీనిపై అధికారికంగా ఎలాంటి ధృవీకరణ లేదు.తాండూరులోని మొత్తం 46 ప్రైవేట్ పాఠశాలల కరస్పాండెంట్లు సమావేశమై ఈ వ్యవహారంపై స్పష్టమైన నిర్ణయం తీసుకోవాల్సిన పరిస్థితి ఏర్పడింది. మోహనకృష్ణ గౌడ్ అధ్యక్షతన ఏర్పడిన TRSMAకు మెజార్టీ పాఠశాలల యాజమాన్యాలు మద్దతు ఇస్తాయా? లేక గతంలో కొనసాగిన ప్రైవేట్ స్కూల్ అసోసియేషన్‌కే తమ మద్దతు ఉంటుందని మరో వర్గం స్పష్టం చేస్తుందా? అనేది ఇప్పుడు ఆసక్తికరంగా మారింది.గత మూడు నాలుగు నెలలుగా కొనసాగుతున్న ఈ వివాదానికి తాజా పరిణామాలతో ముగింపు పడుతుందా? లేక ప్రైవేట్ స్కూల్ యాజమాన్యాల మధ్య విభేదాలు మరింత ముదురుతాయా? అనేది రానున్న రోజుల్లో తేలనుంది. కాగా ఇదే విషయంలో పలువురు సీనియర్  TRSMA ప్రతినిధులు మాట్లాడుతూ తమకు 32  ప్రైవేట్ పాఠశాలల కరస్పాండెంట్ల మద్దతు ఉందని వారి మద్దతుతోనే మోహనకృష్ణ గౌడ్ నూతన అధ్యక్షులుగా నియమితులయ్యారని తెలిపారు.